Wara li l-Qorti ċaħdet it-talba li preżentaw tliet persuni mill-Kazakistan, Satzahn Ibraev, Tyotr Afanasenko u Akezhan Kazhegldin, fejn talbu lill-Kummisarju tal-Pulizija biex jieħu passi kontra Rakhat Aliyev dwar delitti kontra l-umanità li wettaq fil-Kazakistan, l-avukat tagħhom Lothar de Maiziere ddikjara li se jappella minn din is-sentenza.
"Ngħid li aħna parti sodisfatti u parti diżappuntati. Se nappellaw mid-deċiżjoni. Bid-deċiżjoni l-bibien infetħu aktar. Fit-tieni stadju se nressqu aktar provi. Se nintroduċu ukoll l-opinjoni ta' espert Ġermaniż fuq id-drittijiet umani. Nemmnu li għandna biżżejjed provi u każ b'saħħtu biex nirbħu l-każ," qal de Maiziere.
L-avukat Maiziere esprima d-diżappunt tiegħu għall-fatt li x-xhieda ma tħallewx jagħtu x-xhieda tagħhom fil-Qorti u dan minkejja li f'Novembru kienu preżenti fil-Qorti.
L-avukat Maiziere li kien ukoll l-aħħar Prim Ministru ta' dik li kienet il-Ġermanja tal-Lvant, jispjega li ġew Malta drabi oħra b'rabta ma' dan il-każ. "Kont inħoss li quddiemi qed insib ħitan kbar biss. Illum b'din is-sentenza, il-bibien huma aktar miftuħin għalkemm m'humiex miftuħin beraħ."
Fis-sentenza tagħha l-Qorti ċaħdet it-talba għax ir-rikorrenti li ppreżentaw ir-rikors naqsu milli jippruvaw il-każ tagħhom, jiġifieri li Aliyev wettaq delitti kontra l-umanità.
Fir-rikors kien ingħad li Ibraev u Afansenko kienu inkarigati biex iħarsu lil Kazhegeldin li kien il-Prim Ministru tar-Repubblika tal-Każakstan. Dan tal-aħħar kien irtira minn Prim Ministru fis-sena 1997 għal raġunijet ta' saħħa iżda Ibraev u Afasenko baqgħu jieħdu ħsieb is-sigurtà ta' Kazhegeldin.
Wara li rtira Kazhegeldin ifforma moviment politiku ġdid taħt l-isem "Republican People's Party of Kazakhstan". Konsegwenza ta' hekk, Aliyev ra li dan il-partit ġdid seta' kien ta' theddida għall-ambizzjonijiet politiċi tiegħu.
Dan wassal biex Ibraev u Afansaenko jiġu arrestati u torturati. Dan kien il-bidu ta' persekuzzjoni politika li beda Aliyev li wassal għat-tmiem tal-attivitajiet politiċi ta' dan il-partit.
Dawn l-affarijiet ġraw fil-Każakastan, però dawn it-tliet persuni li ppeżentaw ir-rikors inkarigaw lill-avukat tal-fiduċja tagħhom f'Malta peress li Aliyev jgħix f'Malta.
Min-naħa tiegħu, il-Kummissarju tal-Pulizija ma qabilx mat-teżi li Aliyev hu resident ta' Malta u għalhekk ma hemm ebda lok li titmexxa xi investigazzjoni kontrih għal dak li jirrigwardja l-allegazzjonijiet magħmulin kontrih.
Aliyev hu miżżewweġ lil ċittadina Awstrijakka u għalhekk il-preżenza tiegħu f'Malta hi ġustifikata wkoll mill-fatt li ċ-ċittadini tal-Unjoni Ewropea jistgħu jiċċirkolaw liberament fit-territorju tal-Unjoni Ewropea.
X'ħin ġiet biex tiddeċiedi, il-Qorti tal-Maġistrati ppreseduta mill-Maġistrat Antonio Mizzi qalet li l-Kummissarju tal-Pulizija ma għandux il-jedd li jibda proċeduri rikjesti minn Ibraev, Afanasenko u Kazhegeldin. Dan għax il-liġi tgħid li ma għandhomx jinbdew proċeduri dwar xi reat ħlief mill-Avukat Ġenerali jew bil-kunsens tiegħu. F'dan il-każ jidher ċar li l-Kummissarju tal-Pulizija ma kellu ebda awtorizazzjoni mill-Avukat Ġenerali biex jibda l-proċeduri rikjesti minnhom.
Apparti minn hekk, il-Qorti Kriminali qalet li x-xhieda li ta l-Kummissarju tal-Pulizija "ħalliet ħafna għall-immaġinazzjoni tal-Qorti."
Kompla jingħad li "din il-Qorti mhix se ttawwal fuq dan il-punt iżda hi tal-fehma li ma tistax tasal għall-konklużjoni li Aliyev mhuwiex residenti f'Malta."
Il-Qorti żiedet tgħid li mill-analiżi tal-liġi, jirriżulta ċar li Aliyev seta' wettaq reati kontra l-persuna, iżda li jingħad li wettaq reati kontra l-umanità hi ftit diffiċli. Il-Qorti qalet li jekk it-tliet persuni li ppreżentaw il-kawża riedu li dan il-punt jintrebaħ, il-provi li ġabu mhumiex biżżejjed.
"L-aħjar prova ma saritx. Ir-rikorrenti ma tawx xhieda fil-Qorti u wisq anqas ma tressqu xhieda oħrajn li setgħu jikkonfermaw li l-aġir ta' Aliyev kien kriminuż" saħqet il-Qorti.
Il-Qorti żiedet tgħid li ż-żmien meta Aliyev allegatament wettaq ir-reati kien bejn is-snin 1997 u l-1999, filwaqt li d-delitti kontra l-umanità daħlu fis-seħħ fis-sena 2002 permezz tal-Att numru XXIV.
Il-Qorti spjegat li dan l-att daħal fis-seħħ fit-13 ta' Diċembru tal-2003.
www.inewsmalta.com
